Presidenti Čeferin letër falenderimi FSHF dhe federatave të tjera për solidarizimin dhe bashkëveprimin

Presidenti i Qeverisë Europiane të Futbollit, UEFA, z.Aleksander Čeferin, ka dërguar një letër falenderimi dhe mirënjohjeje për bashkëpunimin dhe solidaritetin e treguar nga FSHF, në këtë periudhë të vështirë pandemike.

Një vlerësim i veçantë shkon për video-konferencën e së martës ku UEFA, bashkarisht me të gjithë anëtarët e saj morën vendime të rëndësishme në lidhje me futbollin në kontinent. Gjatë kësaj mbledhjeje në kushte të jashtëzakonshme, Presidenti Duka shprehu mbështetjen e propozimeve të kreut të futbollit evropian, dhe paraqiti angazhimin maksimal në realizimin e tyre.

“E gjithë bota e futbollit, por edhe shoqëritë tona do të dalin më të forta pas pandemisë. Unë e di që kjo situatë nuk është e lehtë në disa prej shteteve të prekura, por së bashku do tia dalim. Ne do të jemi pranë secilës federatë në këtë kohë të vështirë”, theksoi Presidenti Čeferin.