Pas barazimit 1-1 me Republikën Çeke në Pragë, Kombëtarja shqiptare do të luajë një tjetër sfidë të rëndësishme nesër ndaj Polonisë në stadiumin ‘Air Albania’, duke nisur nga ora 20:45, takim i vlefshëm për kualifikueset e Kampionatit Europian ‘Gjermani 2024’. Kuqezinjtë e drejtuar nga trajneri Silvinjo do të kërkojnë tre pikët nesër në Tiranë ndaj skuadrës së drejtuar nga tekniku Fernando Santos.
Në prag të kësaj sfide të rëndësishme, trajneri Silvinjo dhe mesfushori Ylber Ramadani dolën sot në një konferencë për media, duke iu përgjigjur interesit të gazetarëve shqiptarë dhe atyre polakë. Trajneri Silvinjo u shpreh se pret nga skuadra që ai drejton të ketë sjelljen e duhur në fushë, të japë shpirtin dhe zemrën dhe së bashku me mbështetjen e tifozëve shqiptarë të arrijnë të marrin tre pikët. Trajneri i Kombëtares shqiptare vlerësoi skuadrën polake dhe tha se Shqipëria del në fushë nesër me lojtarë teknikisht të fortë. Silvinjo vlerësoi sulmuesin shqiptar Ernest Muçi dhe sulmuesin e polakëve, Robert Levandovskin.
Ndeshja ndaj Polonisë nesër – Në 90 minuta mund të ndodhë gjithçka, por sigurisht mendoj që ndeshja e nesërme nuk do të ketë diçka ndryshe për ne sepse ne i përgatisim të gjitha ndeshjet njësoj. Që në daljen time të parë kam thënë që dua të shoh një skuadër që të japë zemrën dhe ekipin në fushë. Më pas nisi puna menjëherë, organizimi i ekipit, kemi ndjekur lojtarët kudo që kanë qenë, i kemi monitoruar dhe tani vazhdojmë punojmë për të ecur përpara me objektivat tonë. Edhe nesër me Poloninë, mendoj se është e njëjta situatë. Pres që skuadra të ketë sjelljen e duhur në fushë, duke vendosur zemrën dhe shpirtin. Do të kemi një stadium plot më 20 mijë tifozë. Me mbështetjen e popullit shqiptar mund të bëjmë diçka të madhe.
Ne do të hyjmë në fushë për të bërë një ndeshje shumë të mirë. Lojtarët përgatiten gjithmonë për fitore, por përballë kemi një kundërshtar që ka gjithashtu objektivat e veta. E rëndësishme është që mos të humbim. Në krahasim me Çekinë, Polonia është ndryshe. Duhet të përgatitemi mirë, por edhe për ne ka limite. Ne duhet të hyjmë në fushë me zemër e shpirt por edhe përgatitesh për ndeshjen. Ata kanë një skuadër të fortë teknikisht me lojtarë të nivelit të lartë, kanë trajner me eksperiencë. Por unë jam i kënaqur me skuadrën në gjysmë të rrugës. Kemi 4 ndeshje. Por edhe Shqipëria del në fushë me lojtarë teknikisht të fortë. Mendoj se do të jetë një ndeshje shumë tërheqëse dhe e bukur për t’u parë, në 90 minuta mund të ndodhë gjtihçka. Por edhe ne do të hyjmë për të bërë mirë.
E kam thënë që para se të nisnim ndeshjet që është grup i vështirë, për shkak të shumë situatave. Ne jemi këtu, 50% e kemi bërë por është ende për të bërë, është e vështirë, presim fundin. Nuk është e lehtë, çdo ndeshje është e vështirë, askush nuk të fal asgjë.
Ernest Muçi – Muçin e kemi parë, është i mirë, jemi shumë të kënaqur me të. Ai vendosi ndeshjen ndaj Ishujve Faroe me golin e tij. Ka ardhur me ne edhe më parë. Është një lojtar me ritëm të mirë, shënon, është shumë i mirë. Sot, padyshim kemi Bajramin në formë, një lojtar që po bën shumë mirë, ata konkurrojnë në ndeshje për të luajtur, por pastaj nuk i dihet. Në ndeshje del njëri e ke mundësi. Unë u kam thënë të gjithëve që të 24 janë të rëndësishëm për ne, dikush hyn në lojë për 15 minuta dhe mund të bëjë një gol që të bën të ëndërrosh. Ua kam thënë që në fillim dhe e kanë kuptuar të gjithë. Për mua është e rëndësishme që Muçi e shumë të tjerë e kuptojnë që nuk luajnë ndeshjen por për 10 minuta hyjnë në fushë dhe të ndryshojnë jetën.
Do e presim apo do e sulmojmë Poloninë? – Mendoj se në një ndeshje mund të shohësh gjithçka, të dy fazat e lojës. Të bësh presing 90 minuta është e pamundur, pastaj është edhe distanca e shkurtër mes ndeshjeve. Do të jetë një ndeshje ku do shihet gjithçka, taktika, loja fizike. Por pjesa që ka rëndësi, është teknika e lojtarëve, e jona dhe e tyre. Ata në fund bëjnë diferencën. Por do të jetë ndeshje intensive, duhet të hysh me zemër, shpirt, me mbështetjen e stadiumi. Do ketë momente për presing por edhe për të pritur, mendoj që nga të dy palët do të jetë kështu.
Levandovski – Levandovski është i një niveli të rëndësishëm, por Polonia ka edhe të tjerë. Ne i respektojmë të gjithë, mendoj se niveli i përqendrimit duhet të jetë shumë lart. Por në një ndeshje të tillë nuk është vetëm Levandovski, janë shumë të tjerë. E rëndësishme është që edhe ata do të shqetësohen për lojtarët e fortë që kemi ne. Por padyshim që respektohet historia e lojtarëve shumë të fortë që kanë ata.
Pika e dobët dhe e fortë e Polonisë? Historia thotë që kombëtarja polake ka të kaluar të bukur me shumë gjëra, por për pikën e dobët nuk mund ta them. Të gjithë e kanë një, edhe ne, por nuk mund të them atë që mendojmë ne, Por dihet që është një skuadër me lojtarë shumë të mëdhenj, ekip i fortë me një trajner me shumë eksperiencë. Pika e fortë e saj është historia.
Ndërkaq, edhe mesfushori i ekipit kombëtar, Ylber Ramadani u shpreh se ndaj Polonisë, Shqipëria do të kërkojë vetëm fitoren. Ramadani u shpreh se me mbështetjen e tifozëve, skuadra do të luajë për të marrë tre pikët, për të arritur objektivin: finalet e EURO 2024!
Arritjet personale – Unë kam punuar shumë për të arritur synimet e mia dhe do të vazhdoj të punoj. E vetmja mënyrë për të rritur aty ku do, është të punosh dhe unë nuk e kam ndalur punën.
Të zhgënjyer për barazimin në Çeki? – Ne luajmë gjithmonë për fitore, pavarësisht rezultatit. Luajtëm për fitore edhe në Çeki, por nuk ia dolëm. Atmosfera është e mirë dhe do të luajmë për fitore. Jemi profesionistë dhe dimë të luajmë edhe nën presion. E dimë që do të kemi në krah edhe tifozerinë tonë dhe kemi punuar shumë, për të marrë rezultatin që do të na kënaqte të gjithëve, fitoren. Ne e dimë mirë objektivin tonë dhe do të luajë gjithmonë duke bërë presion lart, pasi duam të fitojmë. Edhe ndaj Polonisë do ta nisim në sulm, pasi duam të marrim tre pikët.
A ia del nesër Shqipëria ndaj Polonisë? – Atmosfera në grup është shumë e mirë. E dimë që do të jetë një ndeshje shumë e vështirë, por ne jemi përgatitur për të bërë më të mirën, ndaj shpresoj të marrim një rezultat pozitiv.