Edicioni i 20-të i kursit të licencimit për trajnerë të nivelit ‘UEFA A’, që është edhe niveli i dytë për nga rëndësia për një trajner futbolli, nis zyrtarisht të hënën e 9 janarit. Në këtë kurs që do të zgjasë 6 muaj, të gjithë trajnerët pjesëmarrës do të ndjekin kurrikulën e përgatitur nga UEFA në bashkëpunim me Sektorin e Edukimit në Federatën Shqiptare të Futbollit.
Kursi do të zhvillohet në ambientet e Shkollës së Trajnerëve në Kamëz dhe do të jetë i ndarë në 7 periudha të ndryshme, nga muaji janar dhe do të përfundojë në muajin qershor të këtij viti. Kjo metodë po aplikohet prej dy vitesh tashmë nga Sektori i Edukimit, në mënyrë që trajnerët të kanë mundësi që t’i implementojnë njohuritë e marra në skuadrat e tyre.
Ky është një kurs shumë i rëndësishëm për trajnerët, pasi të gjithë teknikët që pajisen me këtë licencë marrin statusin e ‘trajnerit profesionist’, duke kaluar kështu nga trajnimi në futbollin amator, në atë profesionist. Licenca A duhet të zotërohet nga të gjithë zëvendës-trajnerët e ekipeve në kampionatin ‘Abissnet Superiore’, ndërsa është gjithashtu e detyrueshme edhe për trajnerët e skuadrave të para dhe ekipeve U-21 e U-19, U-17, U-15 në futbollin profesionist.
Në edicionin e 20-të të këtij kursi marrin pjesë emra të njohur të futbollit shqiptar si: ish-kapiteni i Kombëtares shqiptare, Mërgim Mavraj, lojtari i Kombëtares shqiptare, Ermir Lenjani, ish-futbollisti i përfaqësueses së Kosovës, Besart Berisha, si edhe ish-futbollistë të njohur shqiptarë si Gentjan Muça, Ndriçim Shtubina, Skerdi Bejzade, por edhe disa trajnere vajza si Suada Jashari, Emirjeta Ndoci, Xhemile Berisha.