FSHF organizoi në Shtëpinë së Futbollit një trajnim sensibilizues me arbitrat e Kategorisë së Dytë, të cilët gjykojnë çdo javë ndeshjet e futbollit të moshave U13 – U19, dhe arbitrat e rinj të Akademisë së Arbitrimit në lidhje me mbrojtjen dhe sigurinë e fëmijëve në futboll.
Ky trajnim vjen në vijim të miratimit të Politikës për Mbrojtjen dhe Sigurinë e Fëmijëve që Luajnë Futboll (PMSF) dhe Marrëveshjes së Bashkëpunimit ndërmjet FSHF dhe organizatës Terres des Hommes në fushën e mbrojtjes dhe zhvillimit të fëmijëve në futboll.
Ky aktivitet është në vazhdën e trajnimeve dhe seminareve që synojnë ngritjen e kapaciteteve të punonjësve të departamenteve në varësi të FSHF, duke përfshirë trajnerë, arbitra, përfaqësues rajonalë, menaxherë klubesh dhe më tej, të cilët janë në kontakt dhe të përfshirë në zhvillim aktivitetesh futbollistike më fëmijët.
Oficeri i sigurisë në FSHF dhe Pika Kombëtare për Mbrojtjen e Fëmijëve, Armando Mandro, i cili ishte edhe lektori i trajnimit, shpjegon se synimi është dhënia e njohurive dhe ndërgjegjësimi i arbitrave mbi politikat, procedurat, udhëzimet për identifikimin, trajtimin dhe menaxhimin e rasteve praktike që mund të ndodhin të abuzimit me fëmijët, keqtrajtimet fizike apo psikologjike, bullizimin, neglizhimin, abuzimet seksuale, duke vendosur si prioritet mbrojtjen e shëndetit dhe interesave të fëmijëve që luajnë futboll si dhe respektimin e te drejtave të fëmijëve sipas Konventave dhe legjislacionit në fuqi.
“Mbrojtja e fëmijëve është një nga të drejtat universale në të gjitha vendet dhe çdo vend specifik ka hartuar edhe legjislacionin përkatës. Në Shqipëri është miratuar Ligji nr.18/2017 ‘Për të drejtat dhe mbrojtjen e fëmijëve’ dhe udhëzimet ne zbatim të tij.
Mbrojtja dhe Siguria e Fëmijëve që luajnë futboll do të jetë gjithmonë në vëmendjen tonë, pasi fëmijët janë e ardhmja jonë dhe siguria dhe mirëqenie e tyre është detyrë e të gjithëve. Për periudhën në vazhdim në planifikojmë që ekspertët dhe trajnuesit e Terres des Hommes në bashkëpunim me ata të FSHF, të identifikojnë Pikat e Kontaktit në qytetet kryesore të vendit, ku zhvillojnë aktivitetet sportive futbollistike ekipet profesioniste apo amatore. Ka filluar procesi i trajnimit të pikave të kontaktit, fillimisht në ambientet e FSHF në muajin Dhjetor dhe do të vazhdojë dhe ne muajt në vazhdim”, – thotë Oficeri i sigurisë në FSHF dhe Pika Kombëtare për Mbrojtjen e Fëmijëve, Mandro.
Më pas trajnimet do të shtrihen dhe në rrethet kryesore si Shkodër, Durrës, Fier, Elbasan etj. Synohet trajnimi i pikave dhe përfaqësuesve të klubeve kryesore të futbollit që kanë dhe akademi të moshave U-19, U-17, U-15, U-13 deri te moshat më të vogla.
Më pas trajnimet do të vazhdojnë sipas sistemit kaskadë – trajno trajnuesit – pra pikat kryesore të kontaktit do të trajnojnë punonjësit, trajnerët, menaxherët dhe stafet e tyre dhe gjithë ata që punojnë me këta fëmijë.
UEFA në mbështetje dhe të strategjisë së saj, duke bashkëpunuar ngushtë me Terres des Hommes është fokusuar dhe ka prioritet te saj mbrojtjen dhe sigurinë e fëmijëve që aktivizohen në futboll. Këto prioritete ja ka përcjellë te gjitha federatave anëtare të UEFA duke organizuar edhe trajnime për këto federata.
Duke vënë re që ka raste të abuzimit me fëmijët siç janë abuzimi fizik ose emocional, neglizhimi, bullizmi apo tallja dhe ofendimet deri te abuzimi seksual del nevoja për marrjen e masave për parandalimin dhe reduktimin e tyre. Disa nga abuzimet vijnë edhe pa dashje siç janë presioni për të arritur rezultatin apo pritshmëria më e madhe se sa mundësia.
“Gjithashtu, do të zhvillohen fushata sensibilizuese për ndërgjegjësimin e fëmijëve dhe prindërve të tyre. Parashikohet që në të ardhmen të krijohet edhe platforma online për informimin dhe ndërgjegjësimin e lojtareve, prindërve dhe trajnerëve, me qëllim që çdo person i përfshirë në punën me fëmijët, të këtë informacionin e duhur dhe të nevojshëm për të krijuar një mjedis sa më të sigurt për ta. Në FSHF kemi menduar një projekt të përbashkët me Kosovën për ngritjen e platformës informuese dhe ndërgjegjësuese në gjuhën shqipe si dhe trajnim dhe certifikim online për këtë qëllim”, – shpjegon ndër të tjera Armando Mandro.