Kupa e Shqipërisë për femra/ Tirana mund Partizanin dhe kalon në gjysmëfinale - FSHF

Kupa e Shqipërisë për femra/ Tirana mund Partizanin dhe kalon në gjysmëfinale

Derbi i kryeqytetit mes Tiranës dhe Partizanit, sfidë e vlefshme për Kupën e Shqipërisë është fituar nga vajzat bardheblu të Tiranës. Ndeshja u luajt këtë të enjte në fushën “Skënder Halili” dhe u mbyll me rezultatin 4-1.

Një ndeshje emocionuese kjo mes dy skuadrave të cilat zhvilluan një lojë shumë të bukur dhe luftuese. Në minutën e gjashtë të takimit, numri 6 i Tiranës, Ina Goro hap sfidën, duke kaluar në avantazh ekipin e Tiranës. Shumë raste, por kjo pjesë e takimit mbyllet në favor të Tiranës, të cilat futen në dhomat e zhveshjes me epërsinë e një goli.

Në pjesën e dytë, Partizani kundërpërgjigjet me Joana Milen, e cila barazon shifrat dhe rihap sërish sfidën në minutën e 60-të të takimit. Ky barazim nuk shkon më shumë se pesë minuta, pasi janë sërish vajzat bardheblu ato të cilat gjejnë rrjetën e Partizanit, duke dyfishuar rezultatin përmes Kwim Monakivine. Në minutën e 69-të, Antonela Kosta trefishon rezultatin ndërsa në të 76-ën minutë, Kesiana Goro vulos rezultatin 4-1.

Ky derbi konsiderohet historik sepse është hera e parë që këto dy skuadra përballen me njëra-tjetrën në një aktivitet të tillë si Kupa e Shqipërisë, ndërsa janë përballur edhe dy herë të tjera më parë, në dy sfida të vlefshme për kampionat dhe një miqësore të organizuar nga Federata Shqiptare e Futbollit.

Tirana bëhet kështu gjysmëfinalistja e tretë dhe do të përballet në ndeshjen e ardhshme me ekipin e Apolonisë në Fier.
Më 5 mars (nesër) pritet të përcaktohet edhe gjysmëfinalistja e katërt e këtij edicioni të Kupës së Shqipërisë, në ndeshjen që do të luhet në Fier mes Apolonisë dhe Kinostudios.