Sot në orën 10:00 trajneri i kombëtares A Christian Panucci ka dalë në një konferencë për shtyp në kuadër të ndeshjeve eliminatore të botërorit “Rusi 2018″, me 6 tetor Spanjë-Shqipëri dhe 9 tetor Shqipëri-Itali. Trajneri në fjalën e tij theksoi: “Me Spanjën dhe Italinë janë dy ndeshje shumë të rëndësishme për imazhin e Shqipërisë. Janë dy skuadra më të forta se ne, por futbolli na tregon se edhe përballë më të mirëve mund të bësh diçka të rëndësishme. Dua 11 luanë në fushë. Ne do të provojmë të marrim rezultat. Kemi respekt për këta kundërshtarë, por nuk më pëlqen të dëgjoj që rivalët janë më të fortë ende pa luajtur. Natyrisht që ndeshja me Italinë më emocionon, ashtu si edhe ajo me Spanjën, ku kam kaluar etapën më të rëndësishme në karrierë. Megjithatë, personalisht më intereson vetëm Shqipëria, jam i fiksuar te suksesi i ekipit Kombëtar. Kemi respekt për Spanjën dhe Italinë, por do të provojmë ti ndëshkojmë. Kundër Spanjës është e vështirë të luash mirë, sepse e zotërojnë topin 70 për qind të kohës dhe në fushë luajnë gjithmonë ata. Për Cikalleshin dhe Xhakën nuk kam thënë asnjëherë që nuk do të ktheheshin, ata janë lojtarë të rëndësishëm për ekipin. Xhaka ka kërkuar falje dhe e ka kuptuar gabimin, ndërsa Cikalleshi nuk respektoi orarin dhe vetëm prej kësaj qëndroi në shtëpi, por është një element i rëndësishëm i grupit. Në orbitën e Kombëtares kemi 30 deri në 32 lojtarë, por në dy ndeshjet e fundit kualifikuese preferova të ruaj grupin e zakonshëm. I kam të qartë lojtarët që duhet të ndjek në kampionatin shqiptar. Pas këtyre dy ndeshjeve nis një epokë e re dhe nëse dikush do të jetë në nivelin e duhur do të afrohet në ekip dhe ky është rasti i Sabien Lilajt, një lojtar që po e vëzhgojmë. Kam disa ide për ndeshjen në Alikante, edhe pse bëhet fjalë për një prej skuadrave më të forta në botë. Vullneti, përulësia dhe profesionalizmi të ndihmojnë të arrish atë që do.”-përfundoi fjalën e tij Panucci.
