Java e 18-të dhe e fundit e kampionatit “Abissnet Superiore” për vajza luhet këtë fundjavë, duke përmbyllur kështu një tjetër edicion futbollistik dhe duke i lënë radhë ndeshjeve të “Final 4”.
Takimi i parë i javës së 18-të është ai mes Partizanit dhe Apolonisë. Pas fitores së thellë ndaj Laçit, vajzat e kuqe do të kërkojnë një tjetër rezultat pozitiv në “Arenën e Demave”. Sfida është planifikuar të nisë në ora 13:00. Ndeshja tjetër e së shtunës është Tirana – Teuta, që do të luhet në kompleksin “Skënder Halili: në ora 15:00.
Sakaq, të dielën do të luhen edhe tre takimet e tjera të javës së 18-të të “Abissnet Superiore” për vajza. Në orën 14:00 do të luhen dy prej sfidave, ai mes Gramshit dhe Laçit në Gramsh dhe Skënderbeu që pret Lushnjen në Korçë. Edicionin 2023-2024 do ta përmbyllë ndeshja Vllaznia – Kinostudio, një takim ku shkodranet kryesuese do të luajnë për ta mbyllur kampionatin me fitore. Ndeshja do të luhet në Shkodër në ora 15:00.
Përfundimi i kësaj jave të “Abissnet Superiore” i lë radhën shortit të “Final 4” që do të përcaktojë çiftet gjysmëfinaliste. Ndeshjet do të zhvillohen me takime vajtje-ardhje, teksa sfidat e para do të zhvillohen në fushën e ekipeve të renditura më poshtë në renditje. Në rast barazimi tё pikёve pas dy takimeve tё lojës sё rregullt, skuadra e renditur mё mirё nё klasifikim kualifikohet pёr nё ndeshjen finale.
Finalja e madhe që do të përcaktojë edhe kampionen e këtij edicioni do të luhet më 11 maj në “Shtëpinë e Futbollit”. Sakaq, dy ekipet që nuk kalojnë në finale do të zhvillojnë një ndeshje me një takim, për të përcaktuar vendin e tretë dhe të katërt, me ndeshjen që do të luhet po në “Shtëpinë e Futbollit”.
“Abissnet Superiore” për vajza – Ndeshjet e javës së 18-të:
Partizani – Apolonia 27.04.2024 ora 13:00
Tirana – Teuta 27.04.2024 ora 15:00
Gramshi – Laçi 28.04.2024 ora 14:00
Skënderbeu – Lushnja 28.04.2024 ora 14:00
Vllaznia – Kinostudio 28.04.2024 ora 15:00
