Ditën e sotme në ambjentet e Federatës Shqiptare të Futbollit, është mbajtur mbledhja midis FSHF-së dhe klubeve për krijimin e Ligës Profesioniste. Më poshtë disa cështje që u diskutuan gjatë themelimit të Ligës:
- Prezent ishin përfaqësuesit ligjor dhe përfaqesuesit me procurë të klubeve të Kategorisë Superiore. Mungonte përfaqesuesi i KF Tirana;
- Prezent ishte edhe Presidenti i FSHF z.Duka dhe zv/Presidenti z.Libohova;
- U diskutua mbi natyren e anëtarësisë dhe mënyrën e fitimit dhe humbjes. U ra dakord se parimi për anetarësimin në Ligë do të jetë merita sportive. Vetem klubet që për shkak të meritës sportive, janë të renditur në 10-shen e parë, do të jenë anetarë të Ligës. Klubet që për shkak të merites sportive, bien nga kjo kategori, do ta humbasin automatikisht anëtarësinë.
- Nga Partizani dhe Teuta, u propozua që kryetar të zgjidhet z.Libohova si fillim. Te gjithë të pranishmit ishin dakord unanimisht.
- Pas regjistrimit në gjykatë Liga do të bëjë kërkesë për anëtarësim në FSHF, kërkesë e cila do të shqyrtohet në Asamblenë e rradhës;
- U diskutua mbi mundësine që Liga të krijojë komisionet e veta disiplinore. Kjo gjë, sipas Ligjeve të Lojes së IFAB dhe Statutit te FIFA-s nuk lejohet. Për këtë arsye, Presidenti Duka propozoi që liga të ketë të drejtën për të emëruar anëtarë në komisionet e arbitrimit dhe ato të disiplinës. Kjo me qëllim që të jetë e përfaqësuar në vendimarrje. Po ashtu, Presidenti i ftoi të gjithë anetarët që nqs kanë propozime për ndryshime në Kod dhe Rregullore;
- Presidenti i Teutës z.Edmond Hasanbelliu diskutoi mbi nevojën e pavarësisë ekonomike dhe politike të Ligës nga FSHF duke respektuar detyrimet që cdo anëtar ka . Z.Libohova tha se do të filloje nga puna për ti siguruar Ligës të ardhura ekonomike të cilat do të vijnë nga transferimi i kontratës së të drejtës televizive nga FSHF tek Liga si dhe nga kontrata të tjera sponsorizimi;
- Me tej u diskutua mbi mënyrën e akomodimit të selisë së Ligës në një ambjent të përshtatshëm për të gjithë anëtarët si dhe për një draft fillestar për administratën e Ligës.
- Të gjithë anëtarët ranë dakord që drafti aktual i statutit është i natyrës së përgjithshme, me qellim regjistrimin fillestar të Ligës në gjykate dhe ai mund të amendohet në cdo kohë.
- U diskutua mbi hapat e mëtejshem që Liga duhet të ndërmarri në marëdheniet me FSHF. Presidenti Duka propozoi që të gjitha ceshtjet me natyrë teknike, të zgjidhen nëpërmjet një marëveshje kuadër midis dy institucioneve.
