Skuadra perfaqësuesë e futbollit vijon me volum seancat e saj stërvitore në Antalia. Këtë të shtunë pasdite trajneri Panucci është ndalur gjatë sërish te ana taktike duke kërkuar shumë përqëndrim te skuadrës. Pak veprime me topin në fillim dhe më pas seanca ka vijuar me pjesën taktike. Në shumicën e kohës trajneri Panucci ka qenë aktiv së bashku me stafin në zbatimin e skemave në fushë. Vetë trajneri ka ndërhyrë në mënyrë të shpeshtë te lojtarët për ti transmetuar ato që ai kërkon të veprojnë në fushë. Edhe këtë pasdite janë vënë në vëzhgim dy formacione të alternuara nga ana e teknikut në një ndeshje kontrolli. Në jo pak raste vetë mister Panucci ka inkurajuar lojtarët për impulsivitetin dhe angazhimin maksimal. Portat në këtë mini-ndeshje në fund të stërvitjes janë mbrojtur nga Berisha e Hoxha, pasi Strakosha është larguar drejt Italisë për rekuperim të mëtejshëm, sikundër edhe Latifi drejt Budapestit. Po sot, por me një stërvitje të diferencuar, dhe më shumë në aspektin fizik ka punuar futbollisti i sapoardhur nga ekipi kombëtar U-21, Ylber Ramadani. Për ditën e djelë është parashikuar një stërvitje në orën 10.00 dhe më pas në mbrëmje, stërvitja në stadiumin e Antalias. Po kështu, në programin mediatik për ditën e djelë parashikohen:
Ora 12:00 – Konferenca për shtyp e futbollistëve Aliji dhe Veseli
Ora 17:30 – Konferenca për shtyp në stadiumin e Antalias e trajnerit të ekipit kombëtar, Christian Panucci së bashku me kapitenin e skuadrës.
Ora 18:00– Stërvitja në stadiumin ku do të zhvillohet ndeshja (15 minutat e para, me akses tv e mediatik)
