Futbolli shqiptar sot ka humbur një nga figurat më të mëdha. Pas një sëmundje të rëndë, është ndarë nga jeta në moshën 78 vjeçare ish-futbollisti i shkëlqyer i Tiranës dhe Kombëtares, “Mjeshtri i Madh”, Fatmir Frashëri.
Fatmir Frashëri ka lënë shenjë në futbollin shqiptar nga fundit viteve 50-të deri në fillimin e viteve 70-të, si një mbrojtës i shkëlqyer, me një qetësi të admirueshme dhe personalitet të jashtëzakonshëm brenda dhe jashtë fushave të blerta, duke u cilësuar nga të gjithë si një ndër më të shkëlqyerit e brezit të tij. Frashëri ka kontribuar në futbollin shqiptar për shumë vite edhe në pozicionin e trajnerit për shumë vite si edhe ish-President i Klubit të Futbollit Tirana.
“Të dashur miq,
Me shumë hidhërim , po ndaj me ju një lajm shumë të hidhur. Një emër i madh i botës së futbollit, mbrojtësi i Kombëtares dhe Tiranës, ish-Presidenti Klubit Tirana, Fatmir Frashëri, është ndarë nga jeta sot. Ky është një moment i vështirë për të gjithë ne, familjen e Fatmirit, miqtë dhe të dashurit. Unë personalisht sot kam humbur mikun tim Fatmirin, por dhe mikun shumë të mirë të babait tim. Legjenda ka ndërruar jetë por vepra e tij është skalitur në kujtesën e të gjithëve ne, gjithmonë do ta kujtojmë si një nga të urtët e shoqërisë shqiptare.
Në emër të Federatës Shqiptare të Futbollit, të komunitetit të këtij sporti që është më i rëndësishmi në Shqipëri, i shpreh familjes, miqve dhe të afërmve ngushëllimet për humbjen e njeriut të dashur dhe shokut të mirë. Lamtumirë i dashur Fatmir! Lamtumirë mik i shtrenjtë!”, ka deklaruar Presidenti i FSHF-së , Armand Duka, sapo ka mësuar lajmin e dhimbshëm.
Homazhet do të zhvillohen nesër, e shtunë, nga ora 12:30-14:00, në ambientet e stadiumit “Selman Stërmasi”. Varrimi do të zhvillohet në Sharrë.
