Federata Shqiptare e Futbollit do të organizojë për të dytin vit radhazi seleksionime me futbollistët shqiptarë të talentuar, të cilët jetojnë në Shtetet e Bashkuara të Amerikës dhe Kanada.
Seleksionimet do të zhvillohen më 18 maj 2024, në kompleksin “Hudson Sports Complex, Warwick NY” dhe do të jenë të fokusuara te lojtarët e vitlindjeve 2009-2010-2011, ndërsa është i hapur edhe për futbollistet vajza pa kufizime moshe.
Në seleksionimet me futbollistët shqiptarë të talentuar, të cilët jetojnë në Shtetet e Bashkuara të Amerikës dhe Kanada do të marrë pjesë edhe Drejtori Teknik i FSHF-së, Fulvio Pea, i cili përveç përzgjedhjes së talenteve të rinj, do të shikojë nga afër edhe ecurinë e lojtarëve që spikatën në seleksionimin e vitit të kaluar të organizuar nga FSHF.
Gjithashtu, Departamenti i ekipeve Kombëtare do të organizojë edhe një ndeshje miqësore më datë 19 maj me lojtarët e spikatur në seleksionimin e vitit të kaluar të vitlindjes 2007-2008.
Seleksionimet kanë si qëllim evidentimin e talenteve të reja, por në të njëjtën kohë edhe për të parë nga afër progresin e lojtarëve që kanë spikatur në seleksionimet e vitit të kaluar të organizuar nga FSHF.
Për të marrë pjesë në seleksionime, të interesuarit duhet të dërgojnë disa të dhëna nëpërmjet adresës së e-mailit seleksionime@fshf.al ku të specifikojnë emrin, mbiemrin, datëlindjen, klubin ku aktivizohen, pozicionin e saktë në fushë, uebin zyrtar të klubit ku luajnë, pasaportën që zotërojnë dhe në të njëjtën kohë të dorëzojnë dhe një numër kontakti. Dita e fundit e aplikimit është data 30 prill.
