Kupa e Shqipërisë shkon sërish në Shkodër! Për të dytin edicion radhazi, Vllaznia shpallet ekipi fitues i Kupës së Shqipërisë, pasi mundi me përmbysje Laçin në “Air Albania” me rezultatin 2-1.
Dy skuadrat dhuruan një lojë fantastike, në praninë e tifozerive përkatëse, të cilat kishin mbushur stadiumin “Air Albania” në përkrahje të ekipeve të tyre të zemrës. Triumfi i Vllaznisë erdhi pikërisht nga një gjuajtje me kokë e Hoxhajt në minutën e 18-të dhe goli i Adilit në minutën e 95-të.
Janë kurbinasit ata të cilët kalojnë të parët në avantazh që në minutën e katërt me Guindo, pas një topi të dhënë saktë nga Velija. Festë në kampin e kurbinasve dhe nga tifozeria e ekipit në “Air Albania”.
Pas golit të skuadrës së drejtuar nga Duro, Vllaznia kërkon me ngulm golin e barazimit, duke tentuar disa herë dhe duke kontrolluar topin mjaft mirë. Goli erdhi në minutën e 18-të, pas një aksioni nga e majta e Liridon Latifit, i cili pasi shmang dy lojtarë të Laçit, kroson brenda zonës ku gjendet Hoxhaj, i cili gjuan bukur me kokë topin duke e dërguar në rrjetë dhe duke barazuar shifrat.
Shkodranët nuk ndalen te goli i barazimit, por tentojnë të gjejnë sërish rrjetën e kurbinasve, duke bërë që pjesa e parë të flasë totalisht për ta. Pavarësisht rasteve të krijuara, 45 minutat e para mbyllen me barazimin 1-1.
Me nisjen e fraksionit të dytë, Laçi bëhet më kërkues për golin e epërsisë, duke iu afruar disa herë zonës shkodrane dhe duke tentuar me Akiniemin, Velijan dhe Guindon, por pa rezultat. Edhe kjo pjesë e lojës mbyllet me shifrat 1-1, teksa skuadrat i drejtohen minutave shtesë, ku shkodranët gjejnë golin e epërsisë pas një predhe të Adilit, që nuk pritet nga portieri i kurbinasve. 2-1 për Vllazninë! Edhe në pjesën e dytë të kohës shtesë, skuadrat dhurojnë mjaft lojë të bukur, por rezultati mbetet i pandryshuar.
Në fund të ndeshjes, u zhvillua edhe ceremonia e dhënies së medaljeve dhe Kupës së Shqipërisë, që iu dorëzuan shkodranëve nga Presidenti i FSHF-së, Armand Duka dhe Sekretari i Përgjithshëm, Ilir Shulku.
Finalja e Kupës së Shqipërisë 2022
Vllaznia 2-1 Laçi
Formacionet e skuadrave
Vllaznia: Zogoviç, Gurishta, Adili, Krymi, Latifi, Jonuzi, Heriç, Bulatoviç, Hakaj, Aralica, Viktor Da Silva.
Trajner : Mirel Josa
Laçi: Dajsinani, Roganoviç, Shehu, Guindo, Malota, Mazrekaj, Adeleke, Deliu, Velija, Ziko, Viktor.
Trajner: Shpëtim Duro
Golat: Guindo 4’/ Hoxhaj 18’, Adili 95’
