Trajneri Gega tregon minifazën e Antalias
29/01/2015 11:45 AM
- Ju jeni kthyer nga një minifazë përgatitore që ekipi U-21 ka zhvilluar në Antalia të Turqisë. Cili ishte qëllimi saj?
- Kjo fazë ishte programuar kohë më parë, me qëllim që të krijon një ide më të qartë për grupin e futbollistëve që do të na përfaqësojë për Eliminatoret e Europianit të ardhshëm, shorti i të cilit do të hidhet në fillimin e muajit shkurt.
- Megjithë pritshmëritë tuaja, nga grupi që ju kishit programuar, kanë ardhur në këtë grumbullim vetëm 3-4 futbollistë. Çfarë ka ndodhur?
- Për fat të keq, shumë lojtarë të listës sonë nuk mundën të vinin për shkak se datat nuk ishin zyrtare dhe klubet e tyre nuk i lanë të vinin në minifazën e Antalias. Ishin gjithsej 13 futbollistë që nuk erdhën në grumbullim nga lista paraprake.
- Atëhere vutë në veprim një “plan B”?
- Thërritëm lojtarë të tjerë, të evidentuar si të talentuar. Pjesa më e madhe ishin 18-19 vjeçarë, madje kishte edhe lojtarë 17 vjeçarë, siç ishte rasti i Bardhit që aktivizohet me Partizanin.
- Çfarë mund të vlerësoni më tepër në këtë minifazë?
- Seriozitetin me të cilën, djemtë u stërvitën dhe ju përgjigjën proçesit stërvitor. Si individë mund të përmend 19 vjeçarin Latifi, që luajti për herë të parë me skuadrën shpresa, apo Adrian Ismajlin, një futbollist 18 vjeçar nga Kosova.
- Çfarë mund të thoni tjetër në lidhje me paraqitjen në Antalia?
- Gjatë kësaj minifaze, që kishte si qëllim kryesor, për të ndjekur nga afër gjendjen e futbollistëve. Programi stërvitor është ndërthurur me disa ndeshje stërvitore, të cilat edhe pse me ekipe me diferencë të madhe në moshë me kundërshtarët treguan për ne, disa detaje teknike në lidhje me kundërshtarët.
- Pas pak ditësh hidhet shorti për Eliminatoret e Kampionatit Europian, çfarë prisni prej tij?
- Thjesht, të njohim kundërshtarët e grupit eliminator. Nuk është se kemi ndonjë preferencë të veçantë, ndërkohë që jemi të ndërgjegjshëm për shkallën e vështirësisë së çdo kundërshtari. Futbolli është rritur kudo dhe është e vështirë, të gjesh skuadra të dobta për ti preferuar si kundërshtarë. Ne na duhet të përqëndrohemi dhe të marrim maksimumin nga lojtarët që kemi në dispozicion.
Duke kontrolluar karten...
