Ka përfunduar turneu i minifutbollit për femra, që u zhvillua në zonën e Elbasanit me pjesëmarrjen e gjashtë skuadrave nga shkollat e mesme të këtij qytetit. Shkolla e mesme “Kostandin Kristoforidhi”, është shpallur fituese e aktivitetit, pasi ka mundur në finale skuadrën e shkollës “Luigj Gurakuqi”, me rezultatin e pastër 3-0. Ky aktivitet interesant, ka tërhequr vëmendjen e opinionit sportdashës në qytetin e Elbasanit edhe për faktin se zhvillohej për herë të parë. Në këtë turne, që ka nisur më datë 23 nëntor dhe është mbyllur më 7 dhjetor të organizuar nga zyra rajonale e FSHF në bashkëpunim me Drejtorinë Arsimore dhe Bashkinë e Elbasanit, morën pjesë gjashtë skuadra: “Luigj Gurakuqi”, “Nikolla Koperniku”, “Kostandin Kristoforidhi”, “Mahir Domi”, “Vasil Kakami” dhe “Dhaskal Todri”.
Sipas nënkryetarit të Bashkisë së Elbasanit, Artim Kovaçi, Bashkia e Elbasanit në bashkëpunim me Federatën shqiptare të Futbollit, drejtorinë Arsimore dhe zyrën rajonale të FSHF, kanë përgatitur një grafik për organizmin edhe të aktiviteteve të tjera të kësaj natyre.
