Dinamo City ka marrë tri pikët e para në fazën “Final 4” të kampionatit “Abissnet Superiore”, pasi mposhti Vllazninë me rezultatin 2-0 në stadiumin “Air Albania”.
Sfida nisi me ritëm të lartë dhe me Vllazninë më kërkuese në minutat e para, ku Mala dhe Balaj provuan të rrezikonin portën e Kirit, por pa arritur të gjejnë rrugën e rrjetës. Edhe Dinamo reagoi me Qardakun dhe Vilën, ndërsa pjesa e parë u mbyll në barazim pa gola.
Në fraksionin e dytë loja fitoi më shumë intensitet, me të dy skuadrat që krijuan raste të mira shënimi. Moment kyç i ndeshjes ishte minuta e 69-të, kur Bajrami u ndëshkua me kartonin e dytë të verdhë, duke lënë Vllazninë me 10 lojtarë.
Dinamo përfitoi nga epërsia numerike dhe kaloi në avantazh në minutën e 77-të me Malomon, që finalizoi një aksion të rrjedhshëm të bluve. Në minutat shtesë, teksa Vllaznia ishte hedhur e gjitha në sulm, Xhejms vulosi suksesin e Dinamos me golin e dytë në një kundërsulm të shpejtë.
Me këtë fitore, Dinamo City e nis në mënyrën më të mirë fazën finale të kampionatit duke shkuar në kuotën e 27 pikëve, ndërsa Vllaznia mbetet me 31 pikë pas ndeshjes së parë në “Final 4”.
