Ekipi kombëtar U-16 ka nisur që prej të shtunës grumbullimin e përgatitjet për dy ndeshjet miqësore kundër Italisë që do të zhvillohen në shtetin fqinj të martën (nesër, ora 14:30) dhe të enjten (ora 10:30). Nën urdhrat e trajnerit Agron Kërçova janë vënë të gjithë futbollistët e grumbulluar për këto dy miqësore luksi ndaj një rivali prestigjoz si Italia. Tekniku shqiptar ka një grup të ri lojtarësh që përbëjnë edhe ekipin kombëtar U-16 për këtë sezon.
Në një prononcim për fshf.org, Mattia Koçi e Serxho Vogli, dy kuqezinjtë e vegjël të cilët janë grumbulluar për herë të parë në radhët e Kombëtares U-16 nuk e fshehin kënaqësinë që janë pjesë e këtij grupi e që do të përfaqësojnë Shqipërinë në këto dy miqësore të rëndësishme.
“Unë jam Mattia Koçi, luaj si mbrojtës në ekipin e Novara-s në Itali. Kam qenë edhe më parë pjesë e ekipit kombëtar U-15, por kjo është hera ime e parë tek Kombëtarja U-16. Jam shumë i lumtur që jam këtu dhe do të jap maksimumin që të marrim rezultate pozitive kundër Italisë. Ëndrrat për të ardhmen? – Dua të luaj tek Interi dhe është shumë e rëndësishme për mua të luaj edhe te Kombëtarja shqiptare” – thotë Mattia Koçi për fshf.org.
Të njëjtën kënaqësi shfaq edhe Serxho Vogli, i cili shprehet shumë i lumtur që është pjesë e këtij grupi e që ka marrë një ftesë nga trajneri Kërçova.
“Quhem Serxho Vogli, luaj tek Akademia e Futbollit në pozicionin e mesfushorit të qendrës. Kjo është hera ime e parë që luaj me ekipin kombëtar U-16, por kam luajtur edhe më parë në ekipin kombëtar U-15. Jam shumë i lumtur që do të luajmë kundër Italisë dhe shpresojmë që të marrim te të dyja takimet rezultate pozitive. Synimi im kur të rritem? – Të luaj te një ekip profesionist dhe te Kombëtarja A” – nënvizon Serxho Vogli për fshf.org.
Kombëtarja U-16 do të udhëtojë ditën e sotme drejt Italisë ku grupit pritet t’i bashkohen edhe 5 futbollistë të tjerë, të cilët aktivizohen në kampionatin italian.
