Janë luajtur këtë fundjavë ndeshjet e javës së katërt në grupin A, në kuadër të organizimit të kampionatit kombëtar për femra U-15.
Murlani ka marrë fitoren e parë pas katër javëve lojë, në një sfidë të vështirë me bregdetaret e Durrësit, me rezultatin final 3-1. Në ndeshjen e parë mes këtyre dy ekipeve, ka qenë Teuta ajo që ka triumfuar me rezultatin 4-0. Të dyja ekipet renditen në kuotën e tre pikëve, me Teutën që mban vendin e tretë për shkak të golavarazhit.
Nga ana tjetër, Vllaznia vijon me paraqitjet e mira edhe në këtë grupmoshë. Në sfidën e së dielës, shkodranet pritën kryeqytetaset e Kinostudios, të cilat i mundën me rezultatin 5-0. Edhe ndeshja e parë mes këtyre dy ekipeve ka përfunduar në favor të Vllaznisë, që ka fituar me rezultatin e thellë 0-7. Vllaznia vazhdon të kryesojë bindshëm renditjen, me 12 pikë pas katër javëve lojë ndërsa Kinostudio renditet e dyta, në kuotën e 6 pikëve.
Kampionati Kombëtar U-15 për femra
Java e katërt, Grupi A
Murlan-Teuta 3-1
Vllaznia-Kinostudio 5-0
Kjo është renditja e ekipeve të grupit A pas javës së katërt:
Vllaznia 12 pikë
Kinostudio 6 pikë
Teuta 3 pikë
Murlani 3 pikë
