Emri: Anila
Mbiemri: Basha
Vendlindja: Lushnje
Kombësia: Shqiptare
Datëlindja: 25.12.1976
Gjuhë të huaja: Anglisht, Italisht, Frëngjisht
Anëtare e Komitetit Ekzekutiv të FSHF-së
Anila Basha lindi në qytetin e Lushnjes. U diplomua në degën Gazetari në Fakultetin e Histori-Filologjisë në vitin 1999 dhe më pas ndoqi Master për Studimet Evropiane pranë Universitetit të Tiranës ku u diplomua.
Ka filluar punën si gazetare në vitin 1995, me fillesat në gazetat “Intervista” dhe të përditshmen “Dita Informacion”.
Në vitin 1998 u angazhua si gazetare e politikës dhe më pas redaktore në median “Koha Jonë”.
Ne Vitin 2000 ishte në drejtim të disa mediumeve kryesore si “Koha Jonë” dhe “Panorama”, me pas mori detyrën si kryeredaktore dhe Drejtoreshë në “Gazeta Shqiptare”, një ndër gazetat kryesore në vend, detyrë që e mbajti për më shumë se 10 vite.
Anila Basha, është bashkëthemeluese e medias Shqiptarja.com në versionin print dhe online. Që nga viti 2016, ka themeluar e vetme mediat NEWSBOMB.AL dhe NEWSPORT.AL të cilat plotësuar me revistën Newsbomb.al në print janë shumë të suksesshme në tregun mediatik në Shqipëri. Aktiviteti i saj mediatik pasohet nga dalja e herëpashershme në panelet e ndryshme televizive, politike, sportive dhe sociale, ku spikat energjia dhe përkushtimi për punën fisnike të informimit të publikut.
Aktiviteti si gazetare është pasuar gjithmonë nga specializimet e shumta brenda dhe jashtë vendit, në institucione të rëndësishme të Bashkimit Evropian, apo edhe trajnimet si gazetare e çështjeve të NATO-s.
Pasioni për futbollin u konkretizua në Asamblenë e Përgjithshme të muajit mars 2022, kur zonja Basha u zgjodh anëtarja e parë grua në Komitetin Ekzekutiv të FSHF-së në historinë e futbollit shqiptar. Në fokus të punës së saj janë çështjet e futbollit të vajzave në Shqipëri, por edhe çështjet e medias dhe një komunikim më i mirë me publikun.
