Trajneri i kombëtares shqiptare të futbollit, Christian Panucci ka dalë sot në një konferencë për shtyp në FSHF, duke analizuar dy ndeshjet e fundit Eliminatore të ekipit përfaqësues. Në fjalën e tij Panucci u shpreh: “Jam i kënaqur nga paraqitja e Kombëtares në dy ndeshjet e fundit. Luajtëm mirë ndaj Spanjës, skuadrës më të fortë në botë, ndërsa ndaj luajtëm si të barabartë, duke krijuar edhe 3-4 raste për shënim. Ideja është të mos bëjmë më hapa mbrapa, por te shohim përpara. Në dy miqësoret që do të zhvillojmë në Nëntor do të provojmë skemat me dy sulmues. Kemi një vit kohë për të përgatitur Europianin 2020. Duhet të dalim nga mbrojtja, por duke njohur edhe ato që janë difektet tona. Jemi në fillim të një rrugëtimi, por duhet të krijojmë një ide dhe një bindje. Nuk do të kemi rastin të përballemi gjithmonë me Spanjën, ndërsa me ndeshje si këto të fundit besoj se mund të kishim fituar përballë ekipeve si Norvegjia apo Zvicra. Unë do të punoj për të luajtur futboll, pasi kjo skuadër i ka mundësitë. Kemi një bazë shumë të mirë dhe do ti luajmë ndeshjet tona me kurajo.
Lojtarët më duken të bindur për atë që po bëjmë, skuadra di ta luajë futbollin që kërkoj. Absolutisht nuk duhet të heqim dorë nga cilësia për sasinë. Duhet të dalim nga “guacka”, sepse këtu njerëzit kanë dëshirë të jetojnë dhe këtë e shoh edhe te skuadra. Djemtë më thonë që duan të provojnë të luajnë në sulm dhe fakti që luajtëm si të barabartë me Italinë është një sinjal që mund të bëjmë më tepër. I vetmi shqetësim lidhet me faktin që shumë lojtarë luajnë në Zvicër, Greqi apo Rusi. Intensiteti i stërvitjeve apo i lojës në ato kampionate është i ulët. Këtë problem kam: nëse unë e ngre rritmin e stërvitjes, ata lojtarë lodhen. Me Italinë në minutën e 65-të lojtarët ranë fizikisht, megjithatë dua ti falenderoj, sepse dhanë gjithçka në fushë. Ndoshta dikush u mërzit se i bëra të vraponin shumë, por të gjithë treguan shumë profesionalitet. Do të nis udhëtimet për të gjetur lojtarë të rinj. Në ndeshjet e përfaqësueses së 19-vjeçarëve dhe te ekipi Shpresa do të vëzhgoj dy-tre lojtarë që më pas do ti testojmë në ndeshjet miqësore. Albian Ajeti më jep ndjesinë që po pret Zvicrën. Gjithsesi unë do shkoj ta takoj për të kuptuar çfarë dëshiron. Do të vëzhgoj edhe Manajn te Granada. Kam dëgjuar që është i vështirë, por kështu më thanë edhe për Xhakën. Megjithatë, kur e takova Taulantin ballë për ballë, ai më krijoi bindjen se nuk më tradhëton dhe është i gatshëm të vdesë në fushë. Edhe Manajn duhet ta njoh personalisht për të vendosur. Në sulm dhe në mesfushë kemi mjaft alternativa, por duhet të gjejmë lojtarë në mbrojtje. Agolli është 35 vjeç dhe në Europian do të jetë 37. Tani është shumë mirë, por duhet të mendojmë edhe në perspektivën e Europianit, ku aktualisht kemi dy të rinj si Balliu dhe Memolla. Do të ndjek Lilajn me Skënderbeun në Europa League, ndërsa kam edhe një listë me 10-15 lojtarë që do ti shoh, të cilët luajnë në Gjermani, Greqi, Austri apo Sllovaki ku luajnë disa lojtarë. Duhet të studiojmë gjithçka që mund të na ofrojë Europa. Ky ekip ka nevojë për kualitet.”
